पुणे (प्रतिनिधी):

पुणे शहर आणि परिसरातून दुचाकी चोरणाऱ्या टोळीचा विश्रामबाग पोलीस ठाण्याच्या तपास पथकाने पर्दाफाश केला आहे. या कारवाईत एका विधीसंघर्षीत बालकासह लातूर येथील एका आरोपीला ताब्यात घेण्यात आले असून, त्यांच्याकडून एकूण १० लाख रुपये किंमतीच्या १४ चोरीच्या मोटार सायकली जप्त करण्यात आल्या आहेत.

नवीन पेठ भागातील चिमणबाग सोसायटीसमोरून २३ जून २०२६ रोजी एक होंडा शाईन गाडी (MH 37 AB 3872) चोरीला गेली होती. या प्रकरणी विश्रामबाग पोलीस ठाण्यात भारतीय न्याय संहिता कलम ३०३ (२) अन्वये गुन्हा दाखल करण्यात आला होता.

तपासादरम्यान नारायण पेठ भागात दोन संशयित तरुण आल्याची गुप्त माहिती पोलिसांना मिळाली. पोलिसांनी सापळा रचून कारवाई केली असता, एका संशयिताने अंधाराचा फायदा घेऊन पळ काढला, तर दुसऱ्या विधीसंघर्षीत बालकाला पोलिसांनी ताब्यात घेतले. त्याची चौकशी केली असता, त्याने आपल्या साथीदारांच्या मदतीने पुणे शहर, जिल्हा व इतर ठिकाणांहून दुचाकी चोरल्याची कबुली दिली. तसेच चोरीच्या गाड्या अहमदपूर (जि. लातूर) येथील कृष्णा चंद्रकांत शेळके (वय २६) याला विकल्याचे निष्पन्न झाले. पोलिसांनी तातडीने लातूर येथे जाऊन कृष्णा शेळके यालाही अटक केली.

या कारवाईमुळे पुणे शहर आणि इतर जिल्ह्यातील एकूण १२ गुन्हे उघडकीस आले आहेत.

विश्रामबाग पोलीस ठाणे: ०२ गुन्हे

पुणे व पिंपरी-चिंचवड (समर्थ, हडपसर, भारती विद्यापीठ, विमानतळ, काळेवाडी ठाणे): ०५ गुन्हे

इतर जिल्हे: ०५ गुन्हे

तसेच इतर २ वाहनांच्या मालकांचा शोध सुरु आहे.

सदरची कारवाई पोलीस आयुक्त श्री. अमितेश कुमार, पोलीस सह आयुक्त श्री. संजय दराडे, अप्पर पोलीस आयुक्त पश्चिम विभाग श्री. राजेश बनसोडे, परिमंडळ ०१ चे पोलीस उप-आयुक्त श्री. कृषीकेश रावले, विश्रामबाग विभागाच्या सहा. पोलीस आयुक्त श्रीमती अनुजा देशमाने, विश्रामबाग पोलीस ठाण्याचे वरिष्ठ पोलीस निरीक्षक श्री. नवनाथ जगताप, पोलीस निरीक्षक, गुन्हे, श्री. विकास भिंगारदिवे व श्री. रमेश लाहिगुडे यांच्या सूचना व मार्गदर्शनाखाली तपास पथकाचे प्रभारी अधिकारी सहा. पोलीस निरीक्षक उमेश कारके, पोलीस उप-निरीक्षक सत्यवान गेंड, पोलीस उपनिरीक्षक मेहबुब मोकाशी, पोलीस अंमलदार नितीन मुंढे, अमोल भोसले, महेश कदम, शैलेश सुर्वे, सचिन अहिवळे, शशीकांत दरेकर, कैलास डुकरे, जाकीर मणियार, अनिस शेख, शिवदत्त गायकवाड, सागर मोरे, अर्जुन थोरात, भास्कर गायकवाड, उमेश गव्हाणे यांनी केलेली आहे.

The post विश्रामबाग : पुणे पोलीस दलाची धडक कारवाई; वरिष्ठ अधिकाऱ्यांच्या मार्गदर्शनाखाली आरोपी जाळ्यात!! appeared first on NEW ROKTHOK MAHARASHTRA NEWS.

मांजरी बुद्रुक येथील के.के.घुले विद्यालयात अरुणदादा बेल्हेकर युवा राष्ट्रनिर्माण संस्था व वैजयंती बेल्हेकर ग्रंथालय व वाचनालय यांच्या वतीने आयोजित आदर्श शिक्षक पुरस्कार वितरण सोहळ्यात प्रमुख पाहुणे म्हणून शिंदे बोलत होते यावेळी संस्था अध्यक्ष शैलेंद्र बेल्हेकर, पांडुरंग घुले,बाबासाहेब शिंगोटे, दिलीप घुले,दिपक घुले, पृथ्वीराज शिंदे व्यापीठावर उपस्थित होते यावेळी डॉ.महेंद्र शिंदे यांच्या हस्ते रविंद्र निगडे,वैशाली मोहिते,डॉ. अश्विनी शेवाळे,राजेंद्रकुमार गदादे,अश्विनी बनकर,भगवान बेल्हेकर,मिलिंद कोबल,करुणा कंद,रमेश लोखंडे,किरण उगलमुगले, दत्तात्रय कांबळे यांना आदर्श शिक्षक पुरस्कार प्रदान करण्यात आला तसेच प्रकाश रासकर,उषा राऊत यांना जीवन गौरव पुरस्कार प्रदान करण्यात आला.मानपत्र व फुलाचे रोपटे असे पुरस्काराचे स्वरूप होते.

शिंदे पुढे म्हणाले आजच्या डिजिटल युगात विद्यार्थ्यांसमोर अनेक आव्हाने आहेत. अशा परिस्थितीत शिक्षकांनी विद्यार्थ्यांशी केवळ शिक्षक म्हणून नव्हे, तर मार्गदर्शक आणि विश्वासू व्यक्ती म्हणून संवाद साधण्याची गरज असल्याचे त्यांनी सांगितले.कार्यक्रमाचे प्रास्ताविक रुपाली सोनावळे यांनी केले तर बाबा शेलार वंदना काजळे यांनी संयोजन केले.

अरुणदादा बेल्हेकर युवा राष्ट्रनिर्माण संस्थेच्या वतीने पुणे जिल्ह्यातील विविध शाळा महाविद्यालयातील शिक्षकांना डॉ.महेंद्र शिंदे यांच्या हस्ते आदर्श शिक्षक पुरस्कार देऊन गौरवण्यात आले.

The post अरुणदादा बेल्हेकर युवा राष्ट्रनिर्माण संस्थेच्या वतीने पुणे जिल्ह्यातील विविध शाळा महाविद्यालयातील शिक्षकांना डॉ.महेंद्र शिंदे यांच्या हस्ते आदर्श शिक्षक पुरस्कार देऊन गौरवण्यात आले. appeared first on NEW ROKTHOK MAHARASHTRA NEWS.

पुणे (प्रतिनिधी):

पुणे शहरातील गुन्हेगारीवर अंकुश मिळवण्यासाठी पोलीस आयुक्त अमितेश कुमार यांनी दिलेल्या प्रतिबंधात्मक कारवाईच्या आदेशानुसार, वाघोली पोलीस ठाण्याच्या तपास पथकाने एक मोठी आणि धडाकेबाज कामगिरी केली आहे. पोलीस हवालदार प्रदीप मोटे यांच्या सतर्कतेमुळे एका तडीपार आरोपीच्या मुसक्या आवळण्यात आल्या असून, त्याच्याकडून पिस्तुल आणि जिवंत काडतुसे जप्त करण्यात आली आहेत.

कारवाईचा सविस्तर वृत्त:

दिनांक ०७ सप्टेंबर २०२६ रोजी रात्री २:४५ वाजताच्या सुमारास वाघोली पोलीस स्टेशनचे तपास पथक केसनंद गावठाण परिसरात गस्त घालत होते. या दरम्यान पोलीस हवालदार प्रदीप मोटे (बॅज क्र. ६६१६) यांना गुप्त बातमीदाराकडून मिळालेल्या खात्रीशीर बातमीच्या आधारे एका तडीपार आरोपीस ताब्यात घेण्यात आले.

पो.हवा. प्रदीप मोटे यांच्या तक्रारीवरून वाघोली पोलीस स्टेशनमध्ये आरोपी तानाजी अर्जुन जाधव (वय २६ वर्ष, रा. लाडबा वस्ती, केसनंद, ता. हवेली, जि. पुणे) याच्याविरुद्ध महाराष्ट्र पोलीस अधिनियम, भारतीय हत्यार कायदा व इतर संबंधित कलमांनुसार गुन्हा दाखल करण्यात आला आहे.

४१,००० रुपयांचा मुद्देमाल जप्त:

अटक करण्यात आलेल्या आरोपी तानाजी जाधव याच्याकडून ४१,००० रुपये किमतीचे एक देशी बनावटीचे पिस्तुल आणि दोन जिवंत काडतुसे जप्त करण्यात आली आहेत. या प्रकरणाचा पुढील तपास पोलीस उपनिरीक्षक शिवशंकर राघु करत आहेत.

पोलीस पथकाची कामगिरी:

ही यशस्वी कारवाई पोलीस आयुक्त अमितेश कुमार, अपर पोलीस आयुक्त मनोज पाटील, पोलीस उप-आयुक्त अमिनाश कुमार, सहाय्यक पोलीस आयुक्त श्रीमती अनिता मोरे, वरिष्ठ पोलीस निरीक्षक नंदकुमार गायकवाड व पोलीस निरीक्षक (गुन्हे) श्रीमती पल्लवी मेहेर आणि मंगेश जगताप यांच्या मार्गदर्शनाखाली करण्यात आली.

या कारवाईमध्ये पोलीस हवालदार प्रदीप मोटे यांच्यासह पोलीस उपनिरीक्षक शिवशंकर राघु, सपोफौ बाळासाहेब मोराळे, पोलीस शिपाई विशाल गायकवाड, पांडुरंग माने, मारुती वाघमारे, अशोक शेळके, महादेव कुंभार, ऋषीकेश व्यवहारे, भोरडे, शिंदे, घावटे आणि गोरे यांनी महत्त्वपूर्ण भूमिकाबजावली

The post वाघोली पोलीस स्टेशनचे मोठे यश: पो.हवा. प्रदीप मोटे यांच्या फिर्यादीवरून बेकायदेशीर शस्त्र बाळगणारा तडीपार तानाजी जाधव जेरबंद! appeared first on NEW ROKTHOK MAHARASHTRA NEWS.

पुणे:

रिक्षा प्रवासादरम्यान वयोवृद्ध नागरिकांना लक्ष करून हातचालाखीने सोनसाखळी चोरी करणाऱ्या सराईत टोळीचा समर्थ पोलीस स्टेशनच्या तपास पथकाने पर्दाफाश केला आहे. या कारवाईत पोलिसांनी ३ आरोपींना अटक केली असून त्यांच्याकडून १५ लाख रुपये किमतीचे १० तोळे सोन्याचे दागिने जप्त केले आहेत.

समर्थ पोलीस स्टेशन येथे गुन्हा रजि. क्र. १७५/२०२६ (भारतीय न्याय संहिता कलम ३०३(२), ३(५)) अन्वये गुन्हा दाखल करण्यात आला होता. दिनांक १४/०६/२०२६ रोजी सकाळी ११:३० ते ११:४० च्या सुमारास तक्रारदार ज्येष्ठ नागरिक महिला पॉवर हाऊस चौक ते भवानी पेठ असा ऑटोरिक्षाने प्रवास करत असताना, रिक्षातील ४ अनोळखी इसमांनी संगणमत करून त्यांच्या गळ्यातील २५ ग्रॅम वजनाची सोन्याची साखळी (चेन) शिताफीने लांबवली होती.

वरिष्ठ अधिकाऱ्यांच्या सूचनेनुसार समर्थ पोलीस स्टेशनच्या तपास पथकाने चक्रे फिरवली. गोपनीय बातमीदाराकडून मिळालेल्या माहितीनुसार, सदर आरोपी हे जळगाव येथील असून ते एकट्या-दुकट्या वयोवृद्ध प्रवाशांना गाठून चोरी करत असल्याचे निष्पन्न झाले.

तपास पथकाने तात्काळ कारवाई करत मुख्य आरोपी शाकीर जाकीर तेली (वय २९ वर्ष, रा. संतोष नगर, कात्रज, पुणे) याला दि. ०१/०७/२०२६ रोजी अटक केली. त्याच्याकडे केलेल्या कसून चौकशीनंतर त्याच्या इतर साथीदारांची नावे समोर आली:

मोसीन खान नुर खान (वय ३१ वर्षे, रा. गेंदालाल मील, जळगाव)

इस्माईल उर्फ राजु शब्बीर शेख (वय ५० वर्षे, रा. एकता हॉलच्या मागे, जळगाव)

गणेश उर्फ मेमरी (रा. जळगाव – फरार आरोपी)

उर्वरित आरोपी पुन्हा असाच गुन्हा करण्याच्या तयारीत असताना मालधक्का चौक, पुणे येथे पोलिसांच्या जाळ्यात सापडले. त्यांना दि. ०२/०९/२०२६ रोजी रात्री अटक करण्यात आली.

अटक आरोपींकडे सखोल चौकशी केली असता त्यांनी पुणे शहर हद्दीतील सिंहगड रोड, काळे पडळ, वानवडी, बंडगार्डन तसेच पिंपरी-चिंचवड परिसरात अशाच प्रकारचे गुन्हे केल्याची कबुली दिली. आरोपींच्या ताब्यातून सुमारे १५,००,०००/- रुपये किमतीचे १० तोळे वजनाचे सोन्याचे दागिने हस्तगत करण्यात आले आहेत. या गुन्ह्याचा पुढील तपास पोलीस हवालदार (बॅच क्र. १००३) शेख करत आहेत.

सदरची यशस्वी कामगिरी मा. श्री. अमितेश कुमार (पोलीस आयुक्त, पुणे शहर), मा. श्री. संजय दराडे (पोलीस सह आयुक्त), मा. श्री. राजेश बनसोडे (अपर पोलीस आयुक्त, पश्चिम प्रादेशिक विभाग), मा. श्री. कृषिकेश रावले (पोलीस उपआयुक्त, परिमंडळ-०१), मा. श्री. सचिन हिरे (सहाय्यक पोलीस आयुक्त, फरासखाना विभाग) यांच्या मार्गदर्शनाखाली श्री. जयंत राजुरकर (वरिष्ठ पोलीस निरीक्षक), श्री. चेतन मोरे (पोलीस निरीक्षक – गुन्हे), तपास पथकाचे प्रभारी अधिकारी सपोनि श्री. संदीप पाटील, सपोफौ/पगार, पो.हवा. रोहिदास वाघेरे, पो.हवा. इम्रान शेख, पोहवा/औचरे, पोहवा/शिवा कांबळे, पोहवा/अमोल गावडे, मपोहवा/गंगावणे, पोशि/अविनाश दरवडे, पोशि/चौधारे व पो.शि./यादव यांनी केली आहे.

The post “पुण्यात रिक्षात ज्येष्ठांना लुटणारी सराईत टोळी गजाआड; समर्थ पोलिसांकडून १५ लाखांचे दागिने जप्त!” appeared first on NEW ROKTHOK MAHARASHTRA NEWS.

हडपसर (पुणे):

हडपसर-मुंढवा क्षेत्रातील मुख्य व अंतर्गत रस्त्यांवर पडलेल्या खड्ड्यांमुळे नागरिक, ज्येष्ठ नागरिक, शालेय विद्यार्थी आणि दुचाकीस्वारांना मोठ्या त्रासाला सामोरे जावे लागत आहे. पुणे महानगरपालिकेकडून रस्त्यांच्या दुरुस्तीवर खर्च होऊनही अनेक ठिकाणी खड्डे वेळेत बुजवले जात नाहीत. प्रशासनाचे या गंभीर समस्येकडे लक्ष वेधण्यासाठी रिपब्लिकन परिवर्तन पॅंथर संघटनेच्या वतीने ४ सप्टेंबर २०२६ रोजी शांततामय मार्गाने अनोखे आंदोलन छेडण्यात येणार आहे.

या संदर्भात संघटनेचे संस्थापक/अध्यक्ष गजेंद्र (बाबा) प्रकाश मोरे यांनी हडपसर-मुंढवा क्षेत्रीय कार्यालयाचे सहाय्यक आयुक्त आणि हडपसर पोलीस ठाण्याच्या वरिष्ठ पोलीस निरीक्षकांना निवेदनाद्वारे पूर्वसूचना दिली आहे.

आंदोलनाची वैशिष्ट्ये व तपशील:

आंदोलनाचे नाव: “खड्डे बुजाओ, आदमी बचाओ”

आंदोलनाचा प्रकार: स्क्रीन लावून “खड्डे प्रदर्शन आंदोलन”

दिनांक व वेळ: ४ सप्टेंबर २०२६ | सकाळी १०:०० ते सायंकाळी ५:०० वाजेपर्यंत

ठिकाण: हडपसर-मुंडवा क्षेत्रीय कार्यालयासमोर, पुणे

स्क्रीनवर दाखवणार खड्ड्यांचे दृश्य:

या आंदोलनादरम्यान परिसरातील खड्ड्यांची छायाचित्रे व चित्रीकरण (व्हिडिओ) स्क्रीनवर दाखवून नागरिक व प्रशासनाचे लक्ष वेधले जाणार आहे. रस्त्यांवरील खड्डे तातडीने बुजवून मार्ग सुरक्षित व खड्डेमुक्त करावेत, अशी मागणी संघटनेतर्फे करण्यात आली आहे. हे आंदोलन शांततामय व लोकशाही मार्गाने होणार असून कायदा व सुव्यवस्थेचे पालन केले जाईल, असेही निवेदनात स्पष्ट करण्यात आले आहे.

The post उद्या दिसणार हडपसरमध्ये खड्ड्यांचा प्रताप पडद्यावर दिसणार; प्रशासनाचे लक्ष वेधण्यासाठी रिपब्लिकन परिवर्तन पॅंथर आक्रमक!! appeared first on NEW ROKTHOK MAHARASHTRA NEWS.

सासवड पोलीस स्टेशन हद्दीत ‘कोंबिंग ऑपरेशन’; ३० हून अधिक गुन्हेगारांची झाडाझडती, आरोपींना अटक आणि दंडात्मक कारवाई

सासवड (विशेष प्रतिनिधी):

महाराष्ट्र पोलिसांच्या सासवड पोलीस स्टेशनतर्फे हद्दीतील फरारी आणि पाहिजे असलेल्या आरोपींचा शोध घेण्यासाठी, तसेच कायदा व सुव्यवस्था राखण्यासाठी २८ ऑगस्ट २०२६ रोजी रात्रौ ११:०० ते २९ ऑगस्ट २०२६ रोजी पहाटे ०५:०० च्या दरम्यान विशेष ‘कोंबिंग ऑपरेशन’ राबवण्यात आले.

नाकाबंदी आणि गुन्हेगारांवर कारवाई

श्रीनाथ मुख्य चौकात लावण्यात आलेल्या नाकाबंदीदरम्यान गांजा विक्री करणारे, बेकायदेशीर शस्त्र बाळगणारे आणि शरीराविरुद्धचे गुन्हे दाखल असलेल्या ३० पेक्षा जास्त गुन्हेगारांची तपासणी करण्यात आली. यापैकी ८ आरोपी राहत्या घरी आढळून आले. तसेच एन.बी.डब्ल्यू (NBW) वॉरंटमधील २ आरोपींना पोलिसांनी तत्काळ अटक केली.

वाहनांची तपासणी आणि दंड कोंबिंग ऑपरेशनदरम्यान रस्त्यावरून जाणाऱ्या ६० ते ७० लहान-मोठ्या वाहनांची कडक तपासणी करण्यात आली. यामध्ये:

ड्रंक अँड ड्राईव्ह: २ केसेस

एन.डी.पी.एस (NDPS) कन्झम्प्शन: १ केस

इतर कारवाई: १७ केसेस दाखल करून एकूण ₹१५,५००/- इतका दंड वसूल करण्यात आला.

ग्रामीण भागातही शोधमोहीम सदर कोंबिंग ऑपरेशन संपूर्ण सासवड पोलीस स्टेशनच्या हद्दीत राबवण्यात आले. यामध्ये कोडीत, सुपे, नारायणपूर, गुन्होळी, भिवडी, खळद, वनपुरी आणि परींचे या गावांचा समावेश होता. फरार आरोपींचा शोध घेण्यासाठी पोलिसांच्या दोन वेगळ्या टीम तयार करण्यात आल्या होत्या. या मोहिमेत सासवड पोलीस स्टेशनचे ६ अधिकारी, १८ अंमलदार, १ आर.सी.पी. (RCP) टीम आणि ४ पोलीस वाहनांचा ताफा तैनात होता.

वरिष्ठांच्या मार्गदर्शनाखाली कामगिरी ही कारवाई पुणे ग्रामीण पोलीस अधीक्षक श्री. संदीपसिंह गिल्ल, अप्पर पोलीस अधीक्षक श्री. गणेश बिराजदार, उपविभागीय पोलीस अधिकारी श्री. राजेंद्रसिंह गौर आणि पोलीस निरीक्षक संतोष घोळवे यांच्या मार्गदर्शनाखाली करण्यात आली. या मोहिमेत सपोनि वैभव सोनवणे, सपोनि राऊत, पोसई गोडसे, श्रे. पोसई खंडागळे आणि पोलीस अंमलदारांनी सक्रिय सहभाग नोंदवला.

The post सासवड पोलिसांचे धडक ‘कोंबिंग ऑपरेशन’; ३० हून अधिक गुन्हेगारांची झाडाझडती, २ फरारी आरोपींना अटक!! appeared first on NEW ROKTHOK MAHARASHTRA NEWS.

पुणे:

आगामी गणेशोत्सवाच्या पार्श्वभूमीवर कायदा व सुव्यवस्था अबाधित राखण्यासाठी भारती विद्यापीठ पोलिसांनी धडाकेबाज कामगिरी करत मागील दोन दिवसांत तीन गावठी बनावटीचे कट्टे आणि चार जिवंत काडतुसे जप्त केली आहेत. याप्रकरणी दोन वेगवेगळ्या कारवायांमध्ये दोन सराईत गुन्हेगारांना अटक करून त्यांच्यावर गुन्हे दाखल करण्यात आले आहेत.

पहिली कारवाई (दि. २६ ऑगस्ट २०२६):भारती विद्यापीठ पोलीस ठाण्याचे तपास पथक हद्दीत गस्त घालत असताना, रात्री ११:५२ वाजता साई सिद्धी चौक ते चिंतामणी ज्ञानपीठ दरम्यानच्या गल्लीत ओंकार उर्फ बब्या संतोष पवार (वय १८, रा. आंबेगाव पठार, पुणे) हा संशयितरीत्या आढळून आला. त्याची झडती घेतली असता त्याच्याकडे १ गावठी कट्टा आणि २ जिवंत काडतुसे मिळून आली. याप्रकरणी त्याच्याविरुद्ध गुन्हा रजि. क्र. ४४१/२०२६ नुसार भारतीय हत्यार अधिनियम व महाराष्ट्र पोलीस अधिनियमांतर्गत गुन्हा दाखल करण्यात आला आहे.

दुसरी कारवाई:कात्रज डेअरी चौक ते सरहद चौक दरम्यानच्या परिसरात बातमीदारामार्फत मिळालेल्या माहितीच्या आधारे पोलिसांनी सापळा रचला. यावेळी शिरीष जितेंद्र खोपडे (वय २६, रा. आंबेगाव पठार, पुणे) याला ताब्यात घेण्यात आले. त्याच्याकडून २ गावठी कट्टे आणि २ जिवंत काडतुसे जप्त करण्यात आली. त्याच्याविरुद्ध गुन्हा रजि. क्र. ४४४/२०२६ अन्वये गुन्हा दाखल करण्यात आला आहे.

पोलीस आयुक्त परिमंडळ ०२ चे मिलिंद मोहिते, सहाय्यक पोलीस आयुक्त राहुल आवारे यांच्या मार्गदर्शनाखाली वरिष्ठ पोलीस निरीक्षक सुदर्शन गायकवाड, पोलीस निरीक्षक (गुन्हे) संतोष जाधव, पोलीस उपनिरीक्षक निलेश मोकाशी, रवी जाधव, तसेच पोलीस अंमलदार सागर बोरगे, मितेश चोरमोले, अभिनय चौधरी आणि सहकाऱ्यांच्या पथकाने ही कामगिरी फत्ते केली.

सणोत्सवाच्या काळात अशा प्रकारची गुन्हेगारी कृत्य करणाऱ्यांवर कडक कारवाई सुरूच राहील, असा इशारा पोलीस प्रशासनाने दिला आहे.

The post गणेशोत्सवापूर्वी भारती विद्यापीठ पोलिसांची धडाकेबाज कामगिरी; ३ गावठी कट्टे व ४ जिवंत काडतुसांसह दोन सराईत अटक !! appeared first on NEW ROKTHOK MAHARASHTRA NEWS.

पुणे:

पुणे शहर अंमली पदार्थ मुक्त करण्याच्या मोहिमेअंतर्गत मार्केटयार्ड पोलीस ठाण्याच्या पथकाने एका मोठ्या बेकायदेशीर कृत्याचा पर्दाफाश केला आहे. आनंदनगर वसाहत, मार्केटयार्ड येथील एका सार्वजनिक शौचालयाजवळील गल्लीतील घरातून अंमली पदार्थ आणि अवैध दारू विक्री करणाऱ्या अड्ड्यावर धाड टाकून पोलीसांनी तब्बल २५ लाख १८ हजार ८८० रुपये किंमतीचा मुद्देमाल जप्त केला आहे.

२५ लाख रुपयांचे मेफेड्रॉन (एम.डी.) अंमली पदार्थ जप्त (वजन १२५ ग्रॅम).

घातक शस्त्रे (तलवार, कुऱ्हाड, लोखंडी पाईप), इलेक्ट्रॉनिक वजन काटा व दारूचा साठा जप्त.

आरोपी ओम कुंडलीक गायकवाड (वय २५) यास अटक; भाऊ यश गायकवाड फरार, शोध सुरू.

एन.डी.पी.एस. ॲक्ट, दारूबंदी अधिनियम व हत्यार कायद्यांतर्गत गुन्हा दाखल.

मार्केटयार्ड पोलीस ठाण्याचे पोलीस हवालदार महिबुब नदाफ हे परिसरातील अंमली पदार्थ विक्रेत्यांची माहिती घेत असताना, त्यांना गुप्त बातमीदाराकडून माहिती मिळाली की यश कुंडलीक गायकवाड व त्याचा भाऊ ओम कुंडलीक गायकवाड हे आपल्या राहत्या घरी अवैध दारू आणि अंमली पदार्थांची विक्री करत आहेत.

बातमीची खात्री पटल्यानंतर वरिष्ठांच्या सूचनेनुसार पोलीस निरीक्षक (गुन्हे) सुनिता नवले, पोलीस उपनिरीक्षक गडगडे व त्यांच्या पथकाने सदर ठिकाणी धाड टाकली. छाप्यादरम्यान घटनास्थळावरून १२५ ग्रॅम वजनाचे २५ लाख रुपयांचे मेफेड्रॉन (MD) जप्त करण्यात आले.

मेफेड्रॉन (एम.डी.): १२५ ग्रॅम (किंमत ₹२५,००,०००/-)

देशी-विदेशी दारू: १०,४०० रुपये किंमतीच्या बाटल्या

घातक शस्त्रे: १ तलवार, १ कुऱ्हाड, लोखंडी पाईप

इतर: इलेक्ट्रॉनिक वजन काटा व रोख रक्कम (एकूण ₹८,४८०/-)

एकूण जप्त मुद्देमाल मूल्य: ₹२५,१८,८८०/-

याप्रकरणी मार्केटयार्ड पोलीस ठाण्यात गु.र.नं. १६५/२०२६ अन्वये एन.डी.पी.एस. ॲक्ट (कलम ८(क), २२(क)), महाराष्ट्र दारूबंदी अधिनियम (कलम ६५(ई)), भारतीय हत्यार कायदा (कलम ४(२५)), भारतीय न्याय संहिता (कलम ३(५)) आणि महाराष्ट्र पोलीस अधिनियम अंतर्गत गुन्हा दाखल करण्यात आला आहे.

अटक आरोपी: ओम कुंडलीक गायकवाड (वय २५ वर्षे, रा. आनंदनगर वसाहत, मार्केटयार्ड, पुणे).

फरार आरोपी: यश कुंडलीक गायकवाड (पोलीस शोध घेत आहेत).

ही कामगिरी मा. पोलीस आयुक्त श्री. अमितेश कुमार, सह पोलीस आयुक्त संजय दराडे, अपर पोलीस आयुक्त राजेश बनसोडे, पोलीस उप-आयुक्त मिलिंद मोहिते, व स.पो.आ. राहुल आवारे यांच्या मार्गदर्शनाखाली वरिष्ठ पोलीस निरीक्षक विश्वजीत जगताप, पोलीस निरीक्षक सुनिता नवले, पो.उप.नि. अक्षयकुमार गडगडे, स.पो.नि. सुनिल भापकर आणि पोलीस हवालदार व अमंलदारांच्या पथकाने पार पाडली.

The post मार्केटयार्ड पोलीसांची धडक कारवाई: २५ लाखांचे अंमली पदार्थ जप्त; एक अटकेत, भाऊ फरार! appeared first on NEW ROKTHOK MAHARASHTRA NEWS.

हडपसर विषारी दारूकांड: सराईत गुन्हेगार दत्ता उर्फ भावड्या लोंढ्याला अटक; मुख्य सूत्रधार चुलता शाम लोंढे अद्याप मोकाट, नागरिकांमधून संताप

(विशेष प्रतिनिधी)

पुणे शहर हद्दीतील भोसरी आणि हडपसर परिसरात विषारी दारूच्या सेवनाने तब्बल २२ निष्पाप नागरिकांचा बळी गेल्याची अत्यंत धक्कादायक घटना घडली आहे. या संपूर्ण दारूकांडातील मुख्य सराईत आरोपी दत्ता उर्फ भावड्या भीमराव लोंढे (रा. पांढरस्थळ, उरुळी कांचन) याला उरुळी कांचन पोलीस ठाणे व सी.आय.डी. (C.I.D.) पुणे यांच्या संयुक्त पथकाने शिताफीने अटक केली आहे.

वेषांतर करून पळण्याच्या तयारीत असताना पोलिसांनी आवळल्या मुसक्या

हडपसर पोलीस ठाणे (गुन्हा नोंद क्र. ३७९/२०२६) व दापोडी पोलीस ठाणे (गुन्हा नोंद क्र. ११४/२६ कलम १०५, १२३, १२५ भारतीय न्याय संहिता) यांमधील फरार आरोपी दत्ता लोंढे हा शिंदवणे घाट परिसरात वेषांतर करून फिरत असल्याची गोपनीय माहिती पोलिसांना मिळाली होती.

पुणे ग्रामीणचे पोलीस अधीक्षक श्री. संदीप सिंह गिल, पोलीस अधीक्षक शफकत अमना (सी.आय.डी. पुणे घटक), अप्पर पोलीस अधीक्षक श्री. गणेश बिरादार आणि उपविभागीय पोलीस अधिकारी श्री. बापुराव दडस यांच्या मार्गदर्शनाखाली उरुळी कांचन पोलीस स्टेशनच्या वरिष्ठ पोलीस निरीक्षक विजयमाला पवार व पथकाने धडक कारवाई केली. आरोपी दत्ता लोंढे हा राजेवाडी (ता. पुरंदर) येथे वेषांतर करून आणि गाडीची नंबरप्लेट बदलून पळून जाण्याच्या तयारीत असताना पोलिसांनी त्याला ताब्यात घेतले. पुढील तपासासाठी आरोपीला सी.आय.डी. पुणे पथकाचे प्रमुख डी.वाय.एस.पी. शामराव काळे यांच्या सुपूर्द करण्यात आले आहे. आरोपीवर ‘मोक्का’ अंतर्गत कारवाई करण्यात आली आहे.

माफिया चुलता शाम लोंढे मोकाट; दारू व मटका अड्डे जोमात सुरूच

दत्ता लोंढे याला पोलिसांनी गजाआड केले असले, तरी या संपूर्ण टोळीचा सूत्रधार आणि दत्ताचा चुलता शाम लोंढे हा मात्र अद्याप मोकाट फिरत आहे. ज्याच्या मार्गदर्शनाखाली दत्ता लोंढे विषारी दारूची निर्मिती व विक्री करत होता, तो शाम लोंढे उरुळी कांचन, लोणी काळभोर आणि सुपा परिसरात आजही अवैध दारू व जुगाराचे अड्डे खुलेआम चालवत आहे.

दत्ता जेलमध्ये असताना शाम लोंढे याला पोलिसांच्या आशीर्वादाने मोकळे सोडले आहे का, असा संतप्त सवाल स्थानिक नागरिकांकडून उपस्थित केला जात आहे. देशी विषारी दारूचे उत्पादन व मटक्याचे अवैध धंदे करणाऱ्या लोंढे टोळीचा संपूर्ण नायनाट करण्यासाठी मुख्य सूत्रधार शाम लोंढे याला तात्काळ अटक करून त्याचे सर्व अड्डे उध्वस्त करावेत, अशी तीव्र मागणी उरुळी कांचन व परिसरातील नागरिकांनी केली आहे.

The post २२ जणांचा बळी घेणारा दत्ता लोंढे वेषांतर करून पळताना जेरबंद; अवैध धंदे चालवणाऱ्या चुलत्याला कधी अटक करणार? नागरिकांचा सवाल. appeared first on NEW ROKTHOK MAHARASHTRA NEWS.

दिनांक २६ ऑगस्ट २०२६ रोजी पुणे महानगरपालिकेच्या अतिक्रमण विभागामार्फत शिंदे हायस्कूल ते सहकार नगर २ (गोवळकर गुरुजी पथ) परिसरातील रस्ते व पदपथांवरील अनधिकृत अतिक्रमणांवर धडक कारवाई करण्यात आली.

सहकार नगर परिसरातील वाहतूक कोंडी कमी करणे तसेच शालेय विद्यार्थी, नागरिक, पादचारी आणि वाहनधारकांसाठी रस्ते व पदपथ मोकळे करण्याच्या उद्देशाने ही व्यापक कारवाई करण्यात आली.

या कारवाईदरम्यान वाहतुकीस अडथळा ठरणारे २० शेड, ३ स्टॉल, ७ काउंटर, ३ हातगाड्या तसेच इतर अनधिकृत साहित्य जप्त करण्यात आले. दुकानांसमोर तसेच रस्त्याच्या जागेत आणि पदपथांवर उभारण्यात आलेले लोखंडी व प्लास्टिकचे अनधिकृत शेड्स जेसीबीच्या सहाय्याने निष्कासित करण्यात आले.

कारवाईदरम्यान कायदा व सुव्यवस्था अबाधित राहण्यासाठी पोलीस कर्मचारी, महाराष्ट्र सुरक्षा बलाचे जवान आणि बिगारी सेवकांची मदत घेण्यात आली.

या कारवाईमुळे शिंदे हायस्कूल ते गोवळकर गुरुजी पथ हा रस्ता तसेच पदपथ नागरिक व पादचाऱ्यांसाठी मोकळे करण्यात आले आहेत.

सार्वजनिक रस्ते व पदपथांवर अनधिकृतपणे अतिक्रमण करून वाहतुकीस तसेच पादचाऱ्यांना अडथळा निर्माण करू नये, असे आवाहन पुणे महानगरपालिकेकडून करण्यात येत आहे. अनधिकृत अतिक्रमणांवर यापुढेही नियमितपणे व सातत्याने कारवाई करण्यात येणार आहे.

The post पुणे महापालिकेची सहकार नगर भागात धडक कारवाई; रस्ते आणि पदपथ केले अतिक्रमणमुक्त! appeared first on NEW ROKTHOK MAHARASHTRA NEWS.