पुणे: काळेपडळ पोलिसांची धडाकेबाज कामगिरी; ६ चोरीच्या रिक्षांसह सराईत गुन्हेगाराला ठोकल्या बेड्या
पुणे: रिक्षा चोरी करून त्यांना स्क्रॅप केलेल्या रिक्षेंचे नंबर प्लेट लावून वापरणाऱ्या एका सराईत चोराला काळेपडळ पोलिसांनी मोठ्या शिताफीने अटक केली आहे. या कारवाईत पोलिसांनी एकूण १०,७८,०००/- (दहा लाख ७८ हजार) रुपये किमतीच्या ६ रिक्षा जप्त केल्या असून ५ गुन्हे उघडकीस आणले आहेत.
नेमकी घटना काय?
काळेपडळ पोलीस ठाण्याच्या हद्दीत रिक्षा चोरीच्या तक्रारी वाढल्या होत्या. या गुन्ह्यांचा तपास करत असताना पोलीस अंमलदार महादेव शिंदे यांना गुप्त बातमीदाराकडून माहिती मिळाली की, हडपसर येथील सय्यदनगर भागात चोरीची रिक्षा उभी आहे. त्यानुसार पोलिसांनी सापळा रचून शादाब युसुफ अन्सारी (वय २४ वर्षे, रा. सय्यदनगर, महंमदवाडी रोड, हडपसर) याला ताब्यात घेतले.
अशी होती चोरीची पद्धत:
तपासादरम्यान धक्कादायक माहिती समोर आली. आरोपी शादाब हा रिक्षा चोरी केल्यानंतर, त्याला जुन्या किंवा स्क्रॅप झालेल्या रिक्षेंचे नंबर प्लेट लावून फिरवत असे. पोलिसांनी अधिक चौकशी केली असता, त्याने पुणे शहरातील काळेपडळ, चंदननगर, आंबेगाव, संत तुकारामनगर आणि वानवडी या भागांतून रिक्षा चोरल्याची कबुली दिली.
जप्त केलेला मुद्देमाल:
पोलिसांनी आरोपीकडून विविध कंपन्यांच्या एकूण ६ रिक्षा जप्त केल्या आहेत, ज्यांची एकूण किंमत १० लाख ७८ हजार रुपये आहे.
यांनी केली कारवाई:
ही कामगिरी पोलीस उप-आयुक्त परिमंडळ ५ चे राजकुमार शिंदे, सहाय्यक पोलीस आयुक्त अश्विनी राख आणि वरिष्ठ पोलीस निरीक्षक मानिसंग पाटील यांच्या मार्गदर्शनाखाली सहाय्यक पोलीस निरीक्षक अमित शेटे, पोलीस हवालदार प्रविण काळभोर, अमोल कडतुरे, दाऊद सय्यद, प्रतिक लाहिगुडे, महादेव शिंदे, गिरीराज जगदाळे, शाहीद शेख, विशाल ठोंबरे, लक्ष्मण काळे, प्रदीप बेडीस्कर यांच्या पथकाने केली आहे.
काळेपडळ पोलिसांच्या या धाडसी कारवाईमुळे रिक्षा चोरी करणाऱ्यांचे धाबे दणाणले आहेत.
