कदमवाकवस्तीतील तरुणावर तिघांकडून कोयत्याने हल्ला
लोणी काळभोर, : हवेली तालुक्यातील कदमवाक 
वस्ती ग्रामपंचायत हद्दीतील कवडीपाट टोलनाका परिसरात विवाहसमारंभासाठी आलेल्या एका तरुणावर तिघांनी कोयत्याने हल्ला करून गंभीर जखमी केल्याची घटना सोमवारी (ता. २०) रात्री साडेदहाच्या सुमारास घडली. याप्रकरणी लोणी काळभोर पोलीस ठाण्यात तिघांविरुद्ध गुन्हा दाखल करण्यात आला आहे.
आकाश सूर्यकांत पवार (वय २८, रा. वेताळबाबा वसाहत, हडपसर) असे जखमी तरुणाचे नाव असून त्यांनी फिर्याद दिली आहे. सुरेश बाबुराव गायकवाड (वय २८), कुणाल राहुल चांगुडे (वय २८) आणि शुभम धर्मा सोलंकी (रा. कदमवाकवस्ती, ता. हवेली) अशी गुन्हा दाखल करण्यात आलेल्यांची नावे आहेत.
दरम्यान, जखमी अवस्थेत त्यांनी लोणी काळभोर पोलीस ठाणे गाठले. पोलिसांनी तत्काळ त्यांना ससून रुग्णालयात उपचारासाठी पाठविले. उपचारानंतर प्रकृती स्थिर झाल्यावर त्यांनी पोलिसांत तक्रार दाखल केली.
दरम्यान, कोयत्याचे हल्ले ठिकठिकाणी वाढले आहेत; पण हे कोयते येतात तरी कोठून? कोयते बनविणाऱ्यांवरच पोलिसांनी कारवाई करावी, म्हणजे कोयते हल्ले कमी होण्याची शक्यता नागरिकांनी व्यक्त केली आहे.
