- कानिफनाथ घाटात पर्यटकांना लुटणारे ३ आरोपी १२ तासांत गजाआड; फुरसुंगी पोलिसांची धडक कारवाई
फुरसुंगी:
कानीफनाथ मंदिर परिसरातील ‘सिटी व्हीव्ह पॉईंट’ येथे फिरण्यासाठी आलेल्या पर्यटकांना मारहाण करून लुटणाऱ्या तीन सराईत गुन्हेगारांना फुरसुंगी पोलीस ठाण्याच्या तपास पथकाने अवघ्या १२ तासांच्या आत बेड्या ठोकल्या आहेत। आरोपींकडून गुन्ह्यात वापरलेली दुचाकी आणि मोबाईल असा एकूण ५५,००० रुपयांचा मुद्देमाल जप्त करण्यात आला आहे।
पहाटेच्या अंधाराचा फायदा घेऊन लूटमार
पोलीस सूत्रांनी दिलेल्या माहितीनुसार, ११ जून २०२६ रोजी पहाटे ४:३० वाजताच्या सुमारास फिर्यादी हे त्यांचे मित्र आकाश, अथर्व आणि मैत्रीण खुशी यांच्यासह दोन ॲक्टिव्हा दुचाकींवरून कानीफनाथ मंदिर परिसरातील सिटी व्हीव्ह पॉईंट येथे आले होते। त्याच वेळी तिथे एका स्प्लेंडर मोटरसायकलवरून तीन अनोळखी तरुण आले। त्यांनी फिर्यादी व त्यांच्या मित्रांना रस्त्यात अडवून हाताने व दगडाने बेदम मारहाण केली। त्यानंतर जबरदस्तीने १५,००० रुपये किमतीचे दोन मोबाईल हँडसेट आणि ऑनलाईन ट्रान्सफरद्वारे १३,३०० रुपयांची रोकड घेऊन आरोपी घटनास्थळावरून फरार झाले। या धक्कादायक प्रकारानंतर पीडितांनी फुरसुंगी पोलीस ठाण्यात तक्रार दाखल केली, ज्यावरून भारतीय न्याय संहितेनुसार गुन्हा दाखल करण्यात आला।
तांत्रिक विश्लेषणाच्या आधारे पोलिसांचा ‘प्रहार’
घाटातील लूटमारीची घटना गंभीर असल्याने फुरसुंगी पोलीस स्टेशनचे वरिष्ठ पोलीस निरीक्षक अमोल मोरे यांनी तात्काळ तपास पथके रवाना केली। आरोपींचा कोणताही सुगावा नसताना, पोलिसांनी फिर्यादीने दिलेल्या वर्णनावरून आणि गोपनीय बातमीदारांकडून माहिती गोळा करण्यास सुरुवात केली। दरम्यान, पोलीस हवादार श्रीनाथ जाधव यांनी संशयितांच्या मोबाईल नंबरचे तांत्रिक विश्लेषण केले। या तांत्रिक तपासाच्या आधारे आरोपी कानिफनाथ पायथा, बोपगाव येथे लपून बसल्याची खात्रीशीर माहिती पोलिसांना मिळाली।
वरिष्ठांच्या आदेशानुसार तपास पथकाने बोपगाव परिसरात सापळा रचून तीन संशयितांना ताब्यात घेतले। पोलिसी खाक्या दाखवताच त्यांनी गुन्ह्याची कबुली दिली।
अटक करण्यात आलेल्या आरोपींची नावे खालीलप्रमाणे आहेत:
१) प्रतिक दिलीप फडतरे (वय २२, रा. बोपगाव, ता. पुरंदर – धंदा: रसवंतीगृह)
२) ओंकार सुनिल फडतरे (वय २७, रा. बोपगाव, ता. पुरंदर – धंदा: शेती)
३) गणेश नवनाथ कामठे (वय २७, रा. चांबळी, चिलवाळी वस्ती, ता. पुरंदर – धंदा: शेती)
न्यायालयाने आरोपींना पोलीस कोठडी सुनावली असून या गुन्ह्याचा पुढील तपास पोलीस उपनिरीक्षक विनोद पवार करत आहेत।
उत्कृष्ट कामगिरी करणाऱ्या पथकाचे कौतुक
ही यशस्वी कामगिरी पोलीस उप-आयुक्त जिवन बेनीवाल, सहाय्यक पोलीस आयुक्त अनुराधा उदमले यांच्या मार्गदर्शनाखाली वरिष्ठ पोलीस निरीक्षक अमोल मोरे, पोलीस निरीक्षक (गुन्हे) राजेश खांडे यांच्या सूचनेनुसार तपास पथकातील पोलीस उपनिरीक्षक विनोद पवार, बापुसाहेब खंदारे, सहाय्यक पोलीस फौजदार कदम, नितीन गायकवाड, श्रीनाथ जाधव, सागर वणवे, हेमंत कामथे, योगेश गायकवाड आणि गणेश शिंदे यांनी केली आहे। पोलिसांच्या या तत्पर कारवाईमुळे कानिफनाथ परिसरात पर्यटनासाठी जाणाऱ्या नागरिकांनी समाधान व्यक्त केले आहे
