मांजरी घुले वस्ती येथे
नदीवरील लिफ्टद्वारे आणलेले पाणी जुन्या कॅनलमार्गे यवतपर्यंत जाणारा जुना बेबी कॅनल घुले वस्ती येथे फुटल्याने परिसरात मोठे नुकसान झाले आहे. अनेक घरांमध्ये पाणी शिरले, नागरिकांचे नुकसान झाले, तर घाण पाणी सिरम कंपनी परिसरापर्यंत पोहोचल्याने आरोग्याचा प्रश्नही निर्माण झाला आहे.
या घटनेनंतर सर्वात मोठा प्रश्न उपस्थित झाला आहे—याला नेमका जबाबदार कोण?
नागरिकांनी थेट पुणे महानगरपालिका, संबंधित विभाग आणि स्थानिक नगरसेवकांवर निष्काळजीपणाचा आरोप केला आहे.
स्थानिकांच्या म्हणण्यानुसार, काही दिवसांपूर्वीच कॅनलची साफसफाई करण्यात आली होती. मात्र, काम योग्य पद्धतीने न केल्यामुळे किंवा कॅनलची मजबुती न तपासल्यामुळेच ही दुर्घटना घडल्याचा आरोप होत आहे.
तसेच, जुन्या आणि धोकादायक अवस्थेतील कॅनलची वेळोवेळी दुरुस्ती न केल्यामुळे प्रशासनाने दुर्लक्ष केल्याचेही समोर येत आहे.
नागरिकांचा संताप वाढत असून त्यांनी पुढील मागण्या केल्या आहेत:
झालेल्या नुकसानीची तात्काळ भरपाई द्यावी
दोषी अधिकाऱ्यांवर कारवाई करावी
कॅनलची सखोल तपासणी करून कायमस्वरूपी उपाययोजना करावी
दरम्यान,केवळ पाहणी नव्हे तर ठोस कारवाई होणे गरजेचे असल्याचे लखन राखपसरे, नवनाथ राखपसरे ,करण राखपसरे, दादा राखपसरे,या नागरिकांचे म्हणणे आहे.
ही घटना प्रशासनाच्या निष्काळजीपणाचा नमुना ठरत असून, भविष्यात अशा घटना टाळण्यासाठी जबाबदारी निश्चित करणे अत्यावश्यक बनले आहे.
